ខ្មែរ 
English |
ក្បាលសំបុត្ររបស់សហគមន៍ខ្មែរ (១៩៧៦)។ ប័ណ្ណសារខែមឆែភ។ |
សមាគមដែលដឹកនាំដោយជនជាតិខ្មែរ បានដើរតួនាទីមួយយ៉ាងសំខាន់ ក្នុងការបង្កើត និងភាពចម្រើនរបស់សហគមន៍ឡងប៊ិច។ តាំងពីពេលនិស្សិតមកដល់តំបូងក្នុងអំឡុងឆ្នាំ១៩៦០ ខ្មែរបានរួបរួមទៅជាក្រុមផ្សេងៗសំរាប់ជាការជួយគ្នាទៅវិញទៅមក និងការរក្សាវប្បធម៌ក្នុងសហរដ្ឋនិងស្រុកខ្មែរ។
|
ក្រុមមុនគេគឺ សមាគមនិស្សិតខ្មែរនៅសហរដ្ឋ (KSA) ដែលបានភ្ជាប់និស្សិតខ្មែរទូទាំងសហរដ្ឋ។ នៅពេលដែលអ្នកដែលបានជម្លៀស មកដល់ជំរុំផិនដែលថុន នៅខែឧសភាឆ្នាំ១៩៧៥ អតីតសមាជិករបស់ KSA ដែលរស់នៅក្នុងរដ្ឋកាលីហ្វ័រនីញ៉ាខាងត្បូង បានមករួមគ្នាបង្កើត សមាគមខ្មែរសាមគ្គីនៅសហរដ្ឋ ដើម្បីនាំម្ហូបនិងសំលៀកបំពាក់ មកជួយដល់អ្នករួមជាតិ ហើយនិងជួយគាំទ្រដល់ខ្មែរដែលព្រាត់ប្រាសទូទាំងពិភពលោក។ ពួកគេបានប្រើអាសយដ្ឋានរបស់សមាជិកម្នាក់នៅទីក្រុងឡងប៊ិច ជាអាសយដ្ឋាននៅលើក្បាលសំបុត្រ។ បន្ទាប់មកនៅឆ្នាំនោះ ពួកគាត់ក៏បានប្ដូរសមាគមទៅជា សមាគមខ្មែរនៅទ្វីបអាមេរិក (CAA) ហើយក៏បានបង្កើតការិយាល័យនៅឡងប៊ិច។ មិនយូរប៉ុន្មាន CAAក៏បានក្លាយទៅជាសមាគមចំបងក្នុងការជួយជនភៀសខ្លួនរកទីលំនៅ ថ្មី ហើយក៏ក្លាយជាគំរូដែលការិយាល័យជនភៀសខ្លួនសំរាប់ជំនួយរកទីលំនៅ (MAAs) មកប្រើទូទាំងសហរដ្ឋ។
នៅឆ្នាំ១៩៧៧ សមាគម MAA ដែលដឹកនាំដោយខ្មែរគឺ សហគមន៍ខ្មែរ (UCC) ដែលបានបង្កើតឡើងនៅឡងប៊ិច។ UCC មានមុខងារច្រើនប្រភេទ ហើយផ្ដល់សេវាទូទាំងសង្កាត់ឡុសអានហ្ជីលេស និងអរ៉ែញ ខោនធី មិនត្រឹមតែជួយអាស៊ីភាគអគ្នេយ៍ទេ តែថែមទាំងជួយដល់អឺរ៉ុបខាងកើត អាមេរិកខាងកណ្ដាល ម៉ិចស៊ីកូ និងអាហ្វ្រិក។ ក្នុងឆ្នាំ១៩៨០ UCCក្លាយជាសមាគមចំបងក្នុងការជួយជនភៀសខ្លួនក្នុងសហរដ្ឋ។
សមាគមបែប MAA ទាំងពីរនេះបានបង្កើតការងារនិងគ្រឹះទំនាក់ទំនងដែលទាក់ទាញខ្មែរមកពីកន្លែងផ្សេងៗក្នុងសហរដ្ឋ។ ប៉ុន្តែអនុភាពដែលបានបង្កើតឡើងដោយសមាគមនេះមានហួសពីសហគមន៍ខ្មែរដែលកំពុងជឿនលឿន។ ពួកគេបានជួយដល់សុខភាពរបស់មនុស្សទូទាំងទីក្រុងឡងប៊ិច ជាពិសេសក្នុងកំឡុងឆ្នាំ១៩៨០ នៅពេលដែលជំនួយរបស់រដ្ឋក្នុងសេវាសង្គមកិច្ចកំពុងតែចុះថយ ៖
|
«ចំនួននៃប្រជាជនភៀសខ្លួនកើនឡើងដែលមានតម្រូវការពិសេស បានផ្ដល់ឲ្យទីក្រុងឡងប៊ិចមានលំអៀងក្នុងការប្រកួតយកជំនួយពីសហព័ន្ធ រដ្ឋ និងស្រុក។ សមាគមបែបMAA មណ្ឌលសាលារៀន ប្រព័ន្ធបណ្ណាល័យ និងក្រសួងសុខាភិបាល បានប្រជែងឈ្នះលុយជំនួយ រាប់លានដុល្លាយកមកជួយមិនត្រឹមតែសហគមន៍ខ្មែរទេ ថែមទាំងទីក្រុងឡងប៊ិចទាំងមួល។»[i] |
CAA និង UCC ក៏បានជួយដល់ការថែរក្សាវប្បធម៌ខ្មែរក្នុងឡងប៊ិច ដោយទទួលជំនួយសំរាប់ថ្នាក់បង្រៀនខ្មែរ និងសិល្ប ដែលមានរបាំបុរាណ ភ្លេង និងការធ្វើតម្បាញ ។
នៅពេលដែលសមាគមទាំងពីរនេះមានភាពល្បីល្បាញក្នុងឡងប៊ិច មិនត្រឹមតែសមាគមនិងក្រុមទាំងនេះទេដែលជួយសហគមន៍ឲ្យកើនឡើង។ ជាច្រើនឆ្នាំកន្លងមក មានសមាគមនិងក្រុមជាច្រើន ទាំងតូចទាំងធំបានបង្កើតឡើង ដើម្បីបំពេញតម្រូវការនិងការកើនឡើងរបស់វប្បធម៌ ពាណិជ្ជកម្ម និងទំនាក់ទំនងនៃសហគមន៍ខ្មែរនៅឡងប៊ិច។ សមាគមទាំងនេះមាន សមាគមព្រះពុទ្ធសាសនា ដែលមានមុខងាខាងរៀបចំវត្តនិងព្រះសង្ឃរាល់ថ្ងៃ, សមាគមសិស្សនៅវិទ្យាល័យនិងសកលវិទ្យាល័យ ដូចជាសង្គមនិស្សិតខ្មែរនៅសកលវិទ្យាល័យឡងប៊ិច, សមាគមសិល្ប ដូចមានរៀបរាប់ក្នុងទំព័រ«សិល្ប»ក្នុងបណ្ដាញនេះ, ក្រុមឯកទេសផ្សេងៗដូចជាក្រុមទាហានខ្មែរ និងសមាគមអ្នកធ្វើការខ្មែរនៅខោនធីឡុសអានជីលិស, សមាគមពាណិជ្ជកម្មដូចជាសភាពាណិជ្ជកម្មខ្មែរអាមេរិកាំង និងសមាគមទីក្រុងខ្មែរ, ក្រុមយុវជនមាន Khmer Girls in Action និង EM3 ដែលជាគម្រោងរបស់ Families in Good Health នៅ St. Mary's Medical Center និង សភាសង្គមខ្មែរដែលរួបរួមសមាគមជាច្រើនដើម្បីធ្វើកម្មវិធីទូទាំងសហគមន៍ដូចជាកម្មវិធីចូលឆ្នាំខ្មែរនៅឧទ្យាន El Dorado និងក្បួនដង្ហែចូលឆ្នាំខ្មែរនៅលើផ្លូវអាណាអែម។
ផ្នែកនៃទំព័រនេះ មានបង្ហាញត្រួសៗពីសមាគមមួយចំនួនដែលមានតួនាទីក្នុងកំណើនរបស់សហគមន៍ខ្មែរនៅទីក្រុងឡងប៊ិចជាច្រើនឆ្នាំមកនេះ។ នេះមិនមែនជាការស្ទង់គ្រប់សមាគមទេ តែនឹងមានការដាក់បន្ថែមទៀតនៅពេលខាងមុខនេះ។ យើងខ្ញុំអញ្ជើញអ្នកទាំងអស់គ្នាដែលចង់បរិច្ចាគឯកសារ សៀវភៅ វីដេអូ ឬរូបថតមកដល់ប័ណ្ណសារ ឬបណ្ដាញទំព័រខែមឆែភនៅសង្គមប្រវត្តិសាស្ត្រទីក្រុងឡងប៊ិច តាមទូរស័ព្ទ ៥៦២-៤២៤-២២២០ ឬសារអេឡិចត្រូនិក
[i] Needham, Susan and Karen Quintiliani (2007) Cambodians in Long Beach, California: The Making of a Community. IN The Journal of Immigrant and Refugee Studies, 5(1):29-53.
Needham, Susan and Karen Quintiliani (2007) Cambodians in Long Beach, California: The Making of a Community. IN The Journal of Immigrant and Refugee Studies, 5(1):29-53.
Needham, Susan and Karen Quintiliani (2008) Cambodians In Long Beach. San Francisco: Arcadia Publishing.